Un tema forte, di attualità, che colpisce allo stomaco come un pugno: ce lo propone la poesia del nostro Nino Ranucci
‘O RAZZISMO
‘O Pataterno ‘o juorno che nce criaje
dicètte ‘e ffaccio tutte quante uguale
ma po’ nce fu quaccuno che penzaje
“‘Sta cosa è strana è stata fatta male”.
Chillo fu ‘o pprencipio ‘e ‘na rivoluzione
e ‘a vita ‘e ‘n’ommo jéve meno ‘e niente
a meliune s’arrestàvene p”a deportazione
chiuse dinte ‘e campe p”o concentramente.
‘Nu pazzo stéve a ccapo d”o nazzismo
‘o partito che ppurtaje ‘a distruzione
‘a duttrina se chiammaje razzismo
razza contro razza p”a cancellazione.
Mo’ se vo’ crére che ‘e cose so’ cagnate
e che ‘a ggente nun è cchiù razzista
però ‘e straniere vanne alluntanate
pecché o so’ mariuole o cammurriste.
E nisciuno ‘o vvo’ capi’ che ‘ncoppo ‘a terra pe’ campà tranquille
nce vo’ cchiù tulleranza ll’odio è bbuono surtanto si è contro ‘a guerra
sinnò p”o munno nun nc’è cchiù speranza.
M’arraccummanno a tté oi figlio mio
si te capite ‘e ‘ncuntrà ggènte ‘e culore
piénze che pure lore so’ ffiglie a Ddio
e trattàlle cumme a ttànte frate e ssòre.
NINO RANUCCI