Torna il nostro amico Nino Ranucci con una nuova poesia, questa volta dedicata alla figura, ormai del tutto tramontata, del “masto”
‘O MASTO
Pe’ mme ca mme piace ‘a bbèlla vita
fa notte quanno pe’ ll’ate se fa juorno
‘a perzona mia è sempe assaje gradita
ovunche vaco tengo ‘a gente attuorno.
Songo aligante e pparlo ‘o ttaliano
i’ songhe ‘n’ommo d’arta suggità
cu’ tutte so’ gentile mordo alla mano
ma guaie a chi mme fa’ ‘na ‘nfamità.
‘E femmene? Ma nun mme ne parlate
sule ca me guardane se sèntene ‘e sveni’
nun arraggionane rummanene ‘ncantate
ma chella ca me ‘ncanta ancora adda veni’.
Songo pacifico e odio la violenza
‘o sanghe è ‘na cosa che mme fa orrore
ma attiente a mme fa’ perdere ‘a pacienza
e allora i’ veco russo e so’ ddulore.
Pe’ chi nun m’avesse ancora canisciuto
amici m’appresento i’ songo ‘o masto
e primma che mme ne vaco e vve saluto
pavàteme da vévere…alla saluta vosta.
Nino Ranucci